సిక్కింలో అదృశ్యమైన టీచర్ బెంగాల్ లో అస్థిపంజరంలా కనిపించింది!

సిక్కింలో ఏడు నెలల క్రితం అదృశ్యమైన ఓ ప్రభుత్వ పాఠశాల ఉపాధ్యాయురాలి అస్థిపంజర అవశేషాలు పశ్చిమ బెంగాల్‌లో వెలుగు చూడటం తీవ్ర కలకలం రేపింది. ఈ ఘటన స్థానికంగా చర్చనీయాంశంగా మారింది. అధికారులు తెలిపిన వివరాల ప్రకారం, సిక్కింలోని నామ్చి జిల్లాలో గల ఒక ప్రభుత్వ పాఠశాలలో నేపాలీ భాషను బోధించే పస్సాంగ్‌ దోమా షెర్పా అనే ఉపాధ్యాయురాలు ఏడు నెలల క్రితం అదృశ్యమయ్యారు.

ఆమె ఆచూకీ లభించకపోవడంతో, కుటుంబ సభ్యులు పోలీసులకు ఫిర్యాదు చేశారు. ఈ ఫిర్యాదు ఆధారంగా కేసు నమోదు చేసుకున్న సిక్కిం మరియు పశ్చిమ బెంగాల్ పోలీసులు సంయుక్తంగా దర్యాప్తు చేపట్టారు. ఈ క్రమంలో, పశ్చిమ బెంగాల్‌లోని సిలిగుడిలో, నామ్చికి సుమారు 100 కిలోమీటర్ల దూరంలో ఉన్న ఒక ఇంట్లోని పడకగదిలో అస్థిపంజర అవశేషాలను పోలీసులు కనుగొన్నారు.

ఈ విషయంపై నామ్చి జిల్లా ఎస్పీ కర్మ గ్యామ్‌త్సో భూటియా మాట్లాడుతూ, "పస్సాంగ్‌ దోమా షెర్పా ఏడు నెలల క్రితం నామ్చిలో కనపడకుండా పోయారు. అప్పటినుంచి సిక్కిం, పశ్చిమ బెంగాల్ పోలీసులు దర్యాప్తు చేస్తున్నారు. సిలిగుడిలోని ఆమె నివాసంలో ఈ అవశేషాలు లభ్యమయ్యాయి" అని వివరించారు.

అవశేషాలు దొరికిన ఇల్లు నిర్మానుష్య ప్రాంతంలో ఉందని, బయటి నుంచి తాళం వేసి ఉండటంతో పోలీసులు తలుపులు పగలగొట్టి లోపలికి వెళ్లాల్సి వచ్చిందని ఎస్పీ తెలిపారు. "లభ్యమైన అస్థిపంజరం దాదాపుగా ఆ టీచర్‌దేనని మేము భావిస్తున్నాము. పోస్టుమార్టం నిమిత్తం అవశేషాలను తరలించాం. కచ్చితమైన నిర్ధారణ కోసం డీఎన్ఏ ప్రొఫైలింగ్ కూడా నిర్వహిస్తాం," అని ఆయన పేర్కొన్నారు.

ప్రస్తుతం ఈ కేసు దర్యాప్తు కొనసాగుతోందని, అపహరణ, నిర్బంధం, అసహజ మరణం వంటి అన్ని కోణాల్లోనూ పోలీసులు విచారణ జరుపుతున్నారని ఎస్పీ వెల్లడించారు. మృతికి గల కచ్చితమైన కారణాలను తెలుసుకునేందుకు ఫోరెన్సిక్‌ దర్యాప్తు ముమ్మరంగా సాగుతోందని ఆయన తెలిపారు. ఈ ఘటనతో స్థానికంగా భయాందోళనలు వ్యక్తమవుతున్నాయి.